Sanctus Ioannes Paulus II explicavit, cum nos offerimur una simul cum Christi Corde, «in ruinis odio violentiaque coacervatis tam optatis amoris civilem condicionem aedificari posse, regnum nempe Christi Cordis»; id procul dubio secum fert, ut «filiarem in Deum amorem cum proximi amore coniungere valeamus»; itaque «haec est vera reparatio a Salvatoris Corde postulata». 192Lettera al Preposito Generale della Compagnia di Gesù (Paredii Monachorum, 5 Octobris 1986): L’Osservatore Romano, 6 Octobris 1986, p. 7. Una cum Christo in ruinis quas nos ex peccato nostro relinquimus, ad novam amoris civilem condicionem instituendam vocamur. Id sibi vult reparare quemadmodum Cor Christi e nobis requirit. Ex vastatione malo peracta, Christi Cor indigere voluit nostra opera ad bonum ac pulchritudinem aedificandam.
Certum est quodvis peccatum Ecclesiae ac societati detrimentum afferre, idcirco «sociale est quodvis peccatum», etsi id ad quaedam potissimum attinet peccata quae «propter ipsum obiectum suum directo proximum» 193S. Ioannes Paulus II, Adhort. ap. Reconciliatio et Paenitentia (2 Decembris 1984), 16: AAS 77 (1985), 213.217. aggrediuntur. Sanctus Ioannes Paulus II planum fecit haec peccata iterata adversus alios “peccati structuram” tandem confirmare, quae populos provehendos afficit. 194Cfr Id., Litt. enc. Sollicitudo rei socialis (30 Decembris 1987), 36: AAS 80 (1988), 561-562. Id saepe ad praeponderantem opinationem spectat, quae ad normam vel ad rationem id iudicat quod revera nimius est sui amor tantum et indifferens animus. Quod haberi potest socialis alienatio: «Alienata est societas quae suis in formis ordinationis socialis et rerum confectionis atque consumptionis difficiliorem reddit traditionem huius doni et huius inter homines conspirationis constitutionem». 195Id., Litt. enc. Centesismus annus (1 Maii 1991), 41: AAS 83 (1991), 84. Non est dumtaxat moralis norma quae nos impellit ad has arcendas sociales structuras alienatas, ad nudandam ac propitiandam vim socialem, quae restituat bonumque aedificet, sed ipsa est «conversio cordis» quae «imponit obligationem» 196Catechismus Catholicae Ecclesiae, n. 1888. tales structuras resarciendi. Nostra est amanti Cordi Iesu Christi responsio, qui amare nos docet.
Eo quod evangelica reparatio gravem hanc socialem vim secum fert, nostri actus amoris, servitii, reconciliationis, ut sint reapse reparantes, requirunt, ut Christus eos cieat, eos inducat eosque efficiat. Asseverabat rursus sanctus Ioannes Paulus II, ut civilis amoris condicio constituatur, hodiernos homines Christi Corde indigere. 197Cfr S. Ioannes Paulus II, Catechesi, 8 Iunii 1994, 2: L’Osservatore Romano, 9 Iunii 1994, p. 5. Christiana reparatio non modo haberi potest sicut extrariarum operarum congeries, quae tamen sunt necessariae ac nonnumquam admirandae. Postulat nempe spiritualitatem, animam, sensum ei vim, impetum et indefessam inveniendi virtutem afferentem. Vita, igne ac luce indiget quae a Christi corde manant.